ديـــــوان الشاعر عيـــد بن سمير البشري

[ماجد البشري]

قصيدة مهداء للأمير/عفاس بن تركي بن محيا أمير الفوج السادس عشر بحائل من الشاعر عيد سمير البشري


راكـب اللـي دقتـه كنهـا دق الذهـب=فوق طبطابة رخام أحسن قصور الملـوك
كنه الذيب يحبـي لاقبـل ولاقفـا حـدب=والرفاف حافـة شمـاغ بسـام محبـوك
مايلـوق الا لـذات المواكـب والجنـب=يفهـق الفكسـار والبهبهانـي والبيـوك
تقل لاناظـرت وجهـه تناظـر بالسكـب=وان سرا عقب العشاء تقل في رحلة مكوك
السريع بنوره يـروح مرجـان وشعـب=والمسارات إلثلاثـة علـى دق السلـوك
للقـزوز يقـول تبـت يديـن ابولـهـب=والقزوز تقول له لعنبـو مـن صـدروك
كمبيوتر شاشتة مثـل كـاس المنتخـب=ومشراته وقفن من عقـب ماهـن بـروك
حجم ست اميه يسابق سريعـات النـدب=لونه يذكرك فـي قطعـة الليـل الحلـوك
وارد الجفـال مركـب سلاطيـن العـرب=عندي اغلى من رصيد الفتيحي بالبنـوك
من طرازات الشبح حي ابـو ذاك الشنـب=ماتمده لا لخـوك مـن ابـوك ولا لبـوك
من شمالـي القصيـم يتنهـض بالطلـب=لين عنه اجبال اجا تنفلق مثـل الحنـوك
ديرةٍ معنـى الكـرم سلـم اهلهـا والأدب=والمعازيـب المحيـا منجيـن الــدروك
جعل يمنى الشيخ عفاس ماهـي للعطـب=لو بها روحه لمن جاه يطلـب قـال دوك
يارسولي قلـه ان الوعـد وقتـه وجـب=حرب لاتنسى وعدهـم تراهـم مانسـوك
في بداية شهر شعبان والا اتلـى رجـب=كم لها تطري عليه وفي صـدري تحـوك
ياطويل العمـر داعـي شبابـه للشبـب=مايبي الا صامل العلـم جـلاي الشكـوك

[ماجد البشري]

رد اللأمير / عفاس بن تركي بن محيا


يارسولـه ياهلابـك على عيـن وهـدب=انت غالي والوفا لـك وللـي رسلـوك
ان يشا الله ناصل الطيبين اهل الحسـب=القلوب البيض والعز وحجـاج ضحـوك
حرب هم راس المعالي عقوبة من حرب=اسأل التاريخ عنهم ويعطيـك الصكـوك
الرجال اللي ليا جيـت نسـوك التعـب=كل واحد يحتفي بك مثل ترحيب اخـوك
حبهم من خالق الكـون عـلام الغيـب=وهبة من واحد في يـده سيـر الفلـوك
من يعشق الطيب يتعب ويشقا ويحسـب=انـت قـدر والنشامـا تراهـم قـدروك
لو يشين الوقت فالراس مرفوع النسـب=مايجي نبت الخزامى مثل عوشز وشوك
مايفيدك بعض الاشكال لاشتـد المهـب=والله لينهار عزمـه ليـا قامـت تلـوك
الردي يبـدا سنافـي ولاطالـت خـرب=ماله بدرب اللغم والمشـوك والشبـوك
دور اللـي بالمهمـات يفرحـك بعجـب=بالفعل صدر شهادة حسن سير وسلـوك
الرفيق اللي على الحق من كفه غضـب=من تجاريب الليالـي والايـام معـروك
وانت شعرك يابن سالم على غيرك صعب=ميدنيك ناس وانـا مـن اللـي ايـدوك
انت تشعب والبقيـه اتخزخـز وتهـذب=خيل شعرك بالجزاله على المعنى تصوك
مثل مامالت عذوق النخل باحلى رطـب=ملت ياعيد ابقصيـدك وطيبـك كلبـوك
من تماثيـل قدرنـا قلمنـا لـك كتـب=طابعين احروفها يوم تمت فـوق بـوك
ودنا ياضحك الاحبـاب نلقالـك سبـب=والزمن نوب يتوسع وفي سرعه يضوك

[ماجد البشري]

هذه القصيدة ا بالشيخ / محمد بن عبدالمحسن الفرم، وهي بعنوان :ـ
(( المدح بالفرم لو يكثر شوي ))


دام اخو حسناء مع الحيين حي=أكثر الحيين عندي تقـل ميـتْ
الردي لو حيي والا مات عـي=ودي اسكت عنه لاكن ما قويت
مايبيك تجيه عاني بـاي شـي=ووده أنك تمدحه في كل بيـت
متربع ويهرج فـي ظـل فـي=لازم تداري شعـوره لاحكيـت
وهرجته هذا فقيـر وذا غنـي=مايسرك كان رحت وكان جيت
الكلام اللي بـلا برهـان نـي=وكان به مقضاة لازم مادريـت
مالقيت ألذّ مـن هـرج البنـي=كـان ودك بالحقيقـه كمبليـت
خذ اليمنى يابو فيصل من ايدي=أحلم أحلم ياولد محسن حَيِيِـت
البلاوي ما سلم منهـا النبـي=وأنت لك صيتٍ يباهي كل صيت
لو عطـاالله مايعـز إلا علـي=قلت له ماقدر ولا كني دريـت
المدح بالفرم لو يكثـر شـوي=ومن ورى الهقوه إلا مني هقيت
والله أنه قد فزع لـي قبـل ذي=فزعة العاهل فهد لاهل الكويـت

[ماجد البشري]

قصيدة في رثاء صياف بن عواد الحربي


وادع علم حرب ورحل عن وطنا=الله يثيبـه والله انـه يحـلـه
صياف بن عواد زبـن المجنـا=عسى الولي بظلال عرشه يظله
يا ما وقف في ساحة الشعر عنا=يرقى بنا في كل عيطـا مطلـه
لو كـروا الشعـار منـا ومنـا=ما صار في قلبه من الخوف ذله
وحنا معه في كل ميقـاف حنـا=واخصامنا من هيبتـه مستشلـه
ليت الليالي لـأبو مفلح صفنـا=او ليتهن على البقا مهلـن لـه
وحنا قبيلة حرب عقبـة حزنـا=وذويه واقرابه وربعه ومن لـه
لو بالمساوم بالذهب لـو وزنـا=مـا يأخـذه طـلاب ولا يصلـه
والموت حـق وبالالـه استعنـا=ننعى السحيمي بالصحف والمجله
وجمهورنا في شامنا وفـيمنـا=كل على صيـاف دمعـه يهلـه
وشعارنا كفـوٍ بهـم ماجهلنـا=لكـن مـا كـل يحـل بمحلـه

[ماجد البشري]

قصيدة جيب لكزس


راكب اللي لاشتغل كن بـه روح الجنيـن=مـــاورد قـبـلـه ولاظـنـتـي يـــرد بـعــده
يسرق الانظار سرقة شعرةٍ مـن عجيـن=والـزيــاق مـذهـبـه والـركــون مـــورده
من بعيد تقول خيمة عـروس فـي بطيـن=ولاقربتـه مـن قريـب تـقـل لــون بــرده
جيب لكزس من موديلات الالفين الثمين=وكـلٌــوا عبدالـلـطـيـف الـجـمـيـل وورده
فرش موكيته تقل مـن شجـرة الياقطيـن=والمـراتـب جـلـد بافـخـم طــراز منـجـده
ماحـلا مسـراه ليـن الصبـح نـوره يبيـن=والـقـزوزات الثـمـان الجحـيـم المـوقـدة
مشربـه بنزيـن ماهـو سمـن ولاسمـيـن=والـبـسـاتــم كـنــهــا عـــمـــدٍ مـــمـــده
الطعـوس يقصهامثـل قــص الاكسجـيـن=والجبـال اللـي كمـا طويـق وجبـال لهـده
مايـلام الـى زعـل مـنـه ابــو عبارتـيـن=لكـزس الالفيـن خـيـر التيـوتـا واجــوده
عنـده الفكسـار لاوقــف لايمـكـن يـزيـن=مــا ينـقـص مـنـه لـكـن تـقــول يـعـقـده
كـن تكييفـه هــواء دار زيــن العابـديـن=تونس الخضراء نعيم المصيـف ورغـده
فيـه لاناظـرت مـاهـوب ريــب ولايقـيـن=نقش اطاراته مثل شكـل نقـش المـزوده
لاسحبـت انـواره تقـول بيـن الازرقـيـن=مايجـي يـاكـود فــي طـايـلات الارصــده
فـي عددهـن يتعـبـن المكـايـن واليـديـن=ماعليهـن غيـر صـورة مـعـزي وولــده
ماملـكـه درويـلــه لابـكــاش ولا بـديــن=مـدة اللـي ينبـع الطيـب مـن راحـة يــده
ابـن زايـد مـن سـلالـة رجــالٍ غانمـيـن=وارثٍ وفــاء السـمـول وطيـبـه ووعــده
علموه انـي علـى موعـده مثـل السجيـن=والـلـيـالـي تــوهــا والـعـمــار مــحــدده
استـلـم مكنـونـةٍ مـثـل ريــح الياسمـيـن=مسكهـا ريحـة عـراره وشيحـه وجـعـده

[ماجد البشري]

قصيدة جيب شاص


راكب اللي تقل يعطيـك ابتسامـه=لانطحـك مـع البلـد والجندليـه
جيب شاصي حوض تايوتا العلامه=مثل حرف الهاء تلـوح بمقدميـه
مثل لون الذيب واليا اسهم اسهامه=ماتشوفه لين تسمع لـه وحيـه
السبيـر بغاربـه تقـول شامـه=وارد ألفين وثلاثـه مـاش زيـه
دفتـره مافيـه لبـاس العمامـه=فوقه النخلـة وسيفيـن محنيـه
وقبل يعتمـده وكيلـه لإستلامـه=وقعـه نايـف وزيـر الداخليـه
شغله ياسايقـه واربـط حزامـه=ووأزن مراتـه وفلـل تانكـيـه
ولاانتهض صدره وصكيت الاجامه=الرياض من القصيم تقـول ميـه
ولا دخلت بعاصمة نجـد اليمامـه=وشفت برج المملكـه والفيصليـه
انحر الربوة وعلمك فـي زمامـه=عانها شرقاٍ جنوب مـن العليـه
واقلـط بقصـرِاٍ لبيبانـه ردامـه=يشبـهـن دروازة ٍ بالناصـريـه
المعونه يابو ناصـر والسلامـه=يا جناب الشهـم والـراح النديـه
ياخو مانع ما علي فيهـا ملامـه=وأنت ياحثـلان راعـى الاولويـه
المصلـي مايسلـم قبـل امامـه=وانت معطيني وعد والشيء نيـه
يالسبيعي عيدنا شوفـك تمامـه=بين عيد الفطر واعيـاد الضحيـه
الفخر بالطيب والعيـب الرخامـه=دام لي روح ٍ مع الحييـن حيـه
كان ماجيـت لمحلـي للكرامـه=(شفة الفنجـال) حارمـة ٍ عليـه

[ماجد البشري]

قصيدة بشاعر المليون


الشعر ماهو شعر والرسم ماهـو رسـم=كان ماشيف الرسم والشعر ماسمع فيـه
أنت فيك الوصف يامهجتي يبقـى وسـم=والمثل لله الأعلـى وهـو مالـه شبيـه
خمس الأحساس تهدا من حديثك والنسم=والهوى والليل والضو والجو والرفيـه
ابتسم ليّـه تـرى الوقـت عيّـا يبتسـم=أنت خلك مايبا إلا أنت كان إنـك تبيـه
منتهى الإخلاص والصدق يحلف لك قسم=يرحـم الله والديـك الثنيـن ووالـديـه
العسل والسمن يشربهن الضميـان سِـم=ومن شربهن نسي ربه وربـه مانسيـه
البري لوكان تسقيـه سِـم يقـول سَـم=صار جاني والحقيقه هو المجني عليـه
لا تحلى بالعطاء وأنـت منيّـت الاسـم=مال كلمة ليه تبرير معنـى غيـر ليـه
السمـات الطيبـه يـوم فيهـا تتـسـم=شينه بحقك عـدم فعلهـا وبقولـك إيـه
بين فمي وقلبي أخـاف سـرك ينقسـم=ومن وراء دمي ترى مخ عظمي محتويه
والله ان الذر يكثر علـى ريـح الدسـم=مير أنا قـدام هـذي وهـذي محتسيـه
مجتمع من كل زوجين عنـدك بالجسـم=وفيك مالا ارى بعيني واحبـه واشتهيـه
احسم الموضوع ياسيد ساداتـي حسـم=أعتقد في كل ميـة غبـي واحـد نبيـه

[ماجد البشري]

طرا ماطرق فوق الورق طاري الطـرا=طريّ الطـرا طاريـه مانـي بطايقـه
رحيق المقل قـام يتدفـق مـن القلـق=رفيـق وثـيـقٍ ماتطـلـق وثايـقـه
غـلاه يتغلغـل بـي وغلغـل غلايلـي=الغـى غـلا غالـي الغالـي غلايقـه
اقصى قصاري كـل جهـدي لمقصـده=تصرم صميمه وانصرم مـن صدايقـه
صدوق التقصي لـه نصيـب يصادقـه=تصاقع صواريـخ الصيـوب بصعايقـه
الاهوى تهاوى بالهـوا وانتهـى الهـوا=واهايـم همـوم المستهـيـم متهايـقـه
الاوع مـلاويـع النعانـيـع بالـولـع=نعاويـه تطلـع مـن عيونـه حقايقـه
لقا بالشقا واللـي هقـى عنـه مااتّقـى=رقـا لانقـا والحـق ماهـو ببايـقـه
قضى ماقضى واللي رضا راضي الرضا=ظروفه ضياهـا مـن لظاهـا تضايقـه
جرى ماجرى والليجرا من ثرى الجرى=مرر الشرى قد غرغرت بـه شرايقـه
سرىماسرى وبسجن الاسرى سرايـره=واللـي تسـرّق ماتـسـرّه سرايـقـه
شراشير شرشـور الشراييـن ناشـره=بشرّه وشرهاتـه علـى ويـش شايقـه
شعر شاعـر بالشعـر ماهـو بشاعـر=ومشاعـر شعـوره شارقـاتٍ شرايه

[ماجد البشري]

قصيدة غلاك بالقلب


غلاك بالقلب انطبـع وانتهـى امـره=وذكراك معي اسرع من رسالة الفكس
حبك من احلا نومـي اقـوم لامـره=ورؤياك اترجمها لغة شفـرة تلكـس
حبك تزود اضعاف سكـرات خمـره=بالقلب ماتمحـاه صابونـة اللكـس
واسباب ما زاده ومـا شـب جمـره=وعن حب غيرك راكس مهجتي ركس
يوم شجرتـك نخلـه وانـت تمـره=كل الغـذا ينسـم والتمـر بالعكـس
حبك غذا روحـي وعمـري يعمـره=ماتكشفه شاشـات طايـرة الاوكـس
صبري عليك احر من جمـر سمـره=واخشى تصير اعلامنا بالهوى نكـس
شف هورشيما راح واسبـاب دمـره=مثر علـى عاقـد وروده كلوركـس
الشهم كلمـه مـن لسانـك تغمـره=والا الذميم اليا لـزق فيـك باتكـس
تـرى دنـي الخلـق للشـر زمـره=لو يلبس البسـام والثـوب تتركـس
الخود عطهن مـن شفايـاك حمـره=مبنى غلاك احدث تصاميم دبلوكـس
ان كان خلي طال عمـري وعمـره=كل العذارى غيره اضرب عليها اكس

[ماجد البشري]

أشتهي هرجتك من بدة النـاس شهـوه=والهبوب من اتجاهك على القلب تهوي
وشوفتك من بد كل المـلا فيهازهـوه=لاتلوم اللي معـك بالسواليـف يغـوي
وغلطته غصب عليه حصلت وانت دعوه=ومعك وصل ليا آخر الطب وشفاه الكوي
ماتطـب بيـوت رب جنـازه لخـلـوه=واعتبر من دونها بالعرب سـد علـوي
اطلب اللي تطلبه بس ابي منـك لهـوه=لو تبي سماك هذي وهـذي مستـوي
اشجع الفرسان مايعتلـي كـل صهـوه=والمحبه جمرها يشوي العاشق شـوي
كفي الأيمـن تمسـك بفنجـال قهـوه=وكفي الأيسر بليل (ن) رفض كل الحوي
شوفتك للعين مثـل المرايـه بصحـوه=لو اناظربك سدا نون عينـي مـاروي
كلمة السر القتيـل اثـرت فيـه بـوه=لابغيت اقولها لك تقـل معيـه خـوي

[ماجد البشري]

** سلاح الغدر مايضرب الرجل غير خلاف **



يارحمـن ياغفـار يــارب يــارواف=انا اعوذبك من قو بطشك علـى الجانيـن
إلآهي وانا العبد الرجاوي وانا الخـواف=ابي جنتك ورضـاك والستـر بالداريـن
بنادم ماهو بنسان لو هو مـن الاشـراف=ليا صار مابـه لارجولـه ولا بـه ديـن
لا جاه الاجل يحمل لقبره على الاكتـاف=يااما يـروح ايسـار والا يـروح يميـن
الاعـمـار عـاريـات وايامـنـا زلاف=وترى كل ماخـط بجبينـك تـراه العيـن
نبي التمر لاكن حايـل ٍ دونـه الكرنـاف=انا ويـن واللـي ياكلـون الكنافـه ويـن
الا يازمن راحت حياتـي بسبـع عجـاف=ليا قلتلك ذا اللحيـن تقـول لـي بعديـن
انا ماطرقت الشعر لاجل الوزن والقـاف=طرقته لاجـل معنـاه ياهـادي النجديـن
وحركت سفنه في محيطه على المجـداف=عقب زعلوا الشعار مـن لعبـة الغاويـن
سلاح الغدر مايضرب الرجل غير خلاف=وهذي تراهـا حيلـة الـلاش والمسكيـن
ترى حكم ربي نافذ ٍ بيـن نـون وكـاف=ويمضي على كل الزعالا مـع الراضيـن
ليا من زبنت ازبن جبل شاسع الاطـراف=يذريك بـذن الله وقـت العسـر والليـن
على الطعس والصيهد صحيح الأثر ينشاف=لكن على الماء والجبـل مستحيـل يبيـن

[ماجد البشري]

ماكثرالشعارفي كـل وادي واتجـاه=والاصابع خمسه وطولهن ماهوسـوا
والشعرمحيط مرجان شعبانـه بمـاه=احد" موهوب شاعر واحدفيه يغـوا
الكلام الغث مافيـه ذوق ولاطـراه=وقاف عبدالله زويبن مثل عين الروا
شعرابوبندريثيرويـشـد الانتـبـاه=لستماع بيوته يجيني ضـرام وخـوا
والفكر ماينذهل غير من شي" دهـاه=والصويب لياحصله شمم مالـه دوا
بصمته بالشعرتعطيك مفهوم الحيـاه=والقمروالشمس والكون والماوالهـوا
مل قلب" يابوبنـدر مبيحـة" خفـاه=شعوا" بالزين ماهـي بيـات شعـوا
مار اناوشلون اصل نقع نقر"في لهاه=قصدي بسنة محمـد وفـلاق النـوا
ونهااللي يوصلون الكـلام لمنتهـاه=وسم ابوها فوق ذوده ليامنـه ضـوا
بالغ" بي حبهـا لوابـرك بالصفـاه=ليتهـا بالجاهليـه حميـا ونـخـوا
عشقتي يبقا مخلـد غلاهـا باللجـاه=يدري بنوي غيابي واناادري وش نوا
ماهوى غيره من الناس مع كل البراه=وهوبعدغيري من الناس قلبه ماهوى
ذكرتني بالملـوح وليـلاه وهـواه=وعنترالعبسي وعبلاه بعيون الجـوا
الصحيح آله لشوفه وخايف من حماه=والموده كنها الموت نـزاع الشـوا
لعنبوحيه وميته وحـي اللـي ربـاه=شارة" من دونها يابيض الوجه مهوا
صاحب" دايم معي بالخيال وبالوجاه=ون بغيت امسك يده قالي مالك لـوا
الرجاوي جعل واليه مايقطع رجـاه=والامااجدى الما على الوردلامنه ذوا
مايشابـه ونتـي غيرثنتيـن" شبـاه=حنة الخلوج والذيـب لامنـه عـوا

[فهد الحربي]

بيض الله وجهك اخي ماجد البشري


وفعلا الشاعر والمبدع الاخ عيد سمير الحربي ( الديوان )

يستاهل كل خير

وليكن هذا اقل من نضع له

فهو شاعر يستاهل كل علم طيب

وصح لسانه وعتلا شانه

وسلمت اناملك اخي

فلك مني جل الثناء والتقدير

[سامي الحربي]

بيض الله وجهك ياماجد

مجهود طيب وشاعر يستحق هاذا الديوان

لاهنت يالنشمي

[مـ ـهـ ـاجرهـ]

لك جزيل الشكر والامتنان على هذا الجهد..

وصح لسان الشاعر عيد بن سمير البشري..

تحيتي..

[ماجد البشري]

بيض الله وجهك اخي ماجد البشري


وفعلا الشاعر والمبدع الاخ عيد سمير الحربي ( الديوان )

يستاهل كل خير

وليكن هذا اقل من نضع له

فهو شاعر يستاهل كل علم طيب

وصح لسانه وعتلا شانه

وسلمت اناملك اخي

فلك مني جل الثناء والتقدير


بيض الله وجهك
اخي فهد الحربي

وهذا اقل مانفدمة لشاعرالكبير أبو عبدالإله

وحين تقرءا شعرة تجد الجزالة والحكمة
وسمو الكلمة وصدق العبارة
وشهادتي فيه مجروحة

[ماجد البشري]

سامي الحربي

وجهك ابيض

لك الشكر على المرور والحضور المشرف

تحياااااااااتي

[ماجد البشري]

العنود العلوي

مشكووووووووره

على المرور والمشاركه

تحياااااااااااتي

[حربي بن حربي]

بيض الله وجهك ياماجد

عيد ابن سمير من فطاحلة الشعر


كل الشكر ياماجد

[ماجد البشري]

حربي بن حربي

وجهك ابيض
ماعليك زود

لك الشكر على المرور والمشاركه

تحيااااااااتي